Wednesday, July 4, 2012

එස්. එම්. සෙනෙවිරත්නයන්ට නිවන් සුව පතමි!

එස්. එම්. සෙනෙවිරත්නයන් අප අතරින් සමුගෙන ඇත.

සැලසුම් ශිල්පියකු ලෙස පුරාවිද්‍යා දෙපාර්තමේන්තුවේ සේවයට බැඳුණු ඔහු, වසර තිස්පහක පමණ සේවා කාලයකින් පසු සහකාර කොමසාරිස් (වාස්තුවිද්‍යා) ලෙස විශ්‍රාම ගත්තේය. මේ කාලය තුළ ඔහු කළ කටයුතු බොහෝය. ඒ එකිනෙක සඳහන් කළ නොහැකි වුවත්, සීගිරි බිතුසිතුවම් මත තීන්න තැවරූ අවස්ථාවේ දී ඒවා යළි පිළිසකර කිරීමට ඔහු දුන් දායකත්වය විශේෂයෙන් සඳහන් කළ යුතුය. (සෙනෙවිරත්න මහතා දුන් දායකත්වය වෙනුවෙන් පුරාවිද්‍යා කොමසාරිස් තැනගේ 1967-68 පාලන වාර්තාවේ ස්තුති කර තිබේ)

පුරාවිද්‍යා දෙපාර්තමේන්තුවෙන් බැහැර ඔහු කළ නිර්මාණ අතර ශ්‍රී ලංකා ජනරජ ලාංඡනය ඉතා වැදගත් නිර්මාණයකි. මේ පිළිබඳව 2001 වර්ෂයේ මැයි මස 22 දින ‘ශ්‍රී ලංකාවේ රාජ්‍ය ලාංඡනය හා වෙනත් ලාංඡන‘ මැයෙන් ඔහු පැවැත්වූ දේශනය විශිෂ්ට දේශනයක් සේ හැඳින්විය හැකිය. ඔහු විසින් ජාතිය වෙනුවෙන් කළ මහඟු සේවා වෙනුනේ ඔහු කලාපති, කලාභූෂණ හා පුරාවිද්‍යා චක්‍රවර්තී යන සම්මානයෙන් පිදුම් ලබා ඇත. 
 
මා ඔහු හ‍ඳුනාගත්තේ ශ්‍රී ලංකා පුරාවිද්‍යා සංගමයෙනි. 1990 ගණන්වල මුල් කාලයේ දී මා පුරාවිද්‍යා සංගමයට බැඳුණු සමයේ ඔහු එහි සාමාජිකයකු වූ බව මතකය. ඒ වන විට ඔහු විශ්‍රාමිකව සිටිය ද පුරාවිද්‍යා විෂය පිළිබඳ පැවැති උනන්දුව නිසා ඔහු හැකි හැමවිටම පුරාවිද්‍යා සංගමයේ කටයුතුවලට ද සම්බන්ධ විය. අසනීප තත්ත්වයෙන් පසු වූ අවස්ථාවල දී පවා තම දරුවකු සමග හෝ ඔහු සංගමයේ රැස්වීම්වලට පැමිණියේය. එසේම ඔහු සංගමයේ සාමාජික්වය සඳහා හඳුන්වා දුන් ශිෂ්‍යයින් ද විය.

පුරාවිද්‍යා සංගමයේ කටයුතු අතර ඉඩකඩ ඇති අවස්ථාවල දී අපට විවිධ මාතෘකා පිළිබඳව සාකච්ඡා කිරීමට ද අපට අවස්ථාව ලැබිණි. එවැනි විටක ඔහු තම අත්දැකීම් විස්තර කරමින් ඇතැම් විටක ඔහු පෑ ප්‍රසන්න මදහස තවමත් මගේ මතකයේ රැදී ඇත.

මම ඔහුට නිවන් සුව පතමි.

ඔහු පිළිබඳ ලියැවුණු ලිපියක් - S M Senevirathne Creator of national crest (Daily News, 2011-7-27, Link)

No comments:

Post a Comment