ඔබටත් සවන් දෙන්න කෙනෙක් ඉන්නව ද?

මේ අදට අවුරුදු තිහකට විතර කලින් වූ සිදුවීමක්. ඒත් ඒක කවදාවත් මට අමතක නොවන්නක්. 

මේ කතාව කී කෙනා එතකොටත් තරමක් වියපත් අයෙක්. විවිධ ලිපි ලියූ ශාස්ත්‍රවන්තයෙක් ලෙසයි මම හඳුනාගත්තෙ. එක දවසක් ඔහුගෙ නිවසේ දී ඔහු මට මෙහෙම කීවා.

"අර x දන්නව නේද?"

"ඔව්. අහල තියනවා" මම කීවා. ඒ කියන අනෙක්‌ කෙනාව මම හඳුනන්නේ නැතත් ශාස්ත්‍රීය කටයුතුවල යෙදුන කෙනෙක් නිසා නමින් දැනගෙන හිටියා.

"දවසක් එයා මට කතා කරල කීවා, වැදගත් දේකට අද හමු වෙන්න පුලුවන් ද කියලා. අපි කාලයක ඉදලා දන්න අයනෙ." දැන් ඔහු විස්තර කියනවා.

ඔහු තවදුරටත් මෙහෙම කීවා.

"ඒත් එදා හොඳ වෙලාවට මට යන්න හිතුනෙ නෑ..." එසේ කියද්දි ඔහුගේ මුවේ මදහසක් මම දුටුවා.

මම මොකුත් අහන්න පෙරම ඔහු හේතුවත් කීවා.

"ඊට දවසකට පස්සෙ තමයි X සුවිසයිඩ් කරගත්තේ. වෙඩි තියාගෙන."

"එදා මං ගියා නං මමත් කරදරේ වැටෙන්න ඉඩ තිබ්බා." ඔහු වැඩිදුරටත් කීවා.

මට කියන්න දෙයක් හිතට ආවෙ නෑ. මොහොතක් හිත නතර උනා.

ඒත් මට හිතුනෙ, ඔහු කලක් දන්නා හිතවතාගේ ජීවිතය බේරාගැනීමට තිබ්බ අවස්ථාවක් නේද ඒ නැති උනේ කියලයි... ඒ දිවි නසාගත් තැනැත්තාට හිතවතෙකු හා කතා කරන්න ලැබුනා නම්, ඔහු ඒ තීරණය නොගන්නට තිබුණා නේද?

එහෙම මිතූරෙකු ඔබටත් මටත් කතා කරන්න පුළුවන්. එහෙම උනොත් ඇහුම්කන් දෙන්න.
මොකද දවසක අපි උනත් ඒ වගේ තීරණාත්මක තත්ත්වයකට පත් වෙන්න පුළුවන්... එදාට අපට සවන් දෙන්න මිතුරෙක් නැති වෙන්න පුළුවන් නිසාම.

ධනේෂ් විසුම්පෙරුම
2025-02-24